ગુજરાતી નેટ જગત

.
પ્રિય મિત્રો!

મેં આપમાંથી ઘણા મિત્રોને ગુજરાતી નેટ જગત અંગે ઈ-મેઈલ મોકલ્યા છે.

આજનો આ ઈ-મેઈલ મારા બ્લોગ “મધુસંચય” પર પણ પ્રસિદ્ધ કરું છું. આપ આ ઈ-મેઈલ “મધુસંચય” પર પણ વાંચી શકશો.

ફરી એક વખત સ્પષ્ટ કરું કે સરસ આરંભ થયો છે. પણ હવે આપણે ચર્ચાથી સહેજ આગળ જવું પડશે.

ચર્ચા કરવી તે કાર્યના આરંભ માટે આવશ્યક છે. એક તરફ ચર્ચા ચાલુ રહેશે, ત્યારે આપણા જેવા કેટલાકે પગલાં ભરવાં શરૂ કરવા પડશે.

આપણી ચર્ચાના પાયાના હેતુ સમજીશું? આપણો ઉદ્દેશ ગુજરાતી ભાષાના સંવર્ધનનો છે. ગુજરાતી ભાષાના પ્રસાર તથા પ્રચારનો છે. તે અર્થે આપણે ગુજરાતી નેટ જગતને લોકપ્રિય તથા લોકભોગ્ય બનાવવું છે. સરળ શબ્દોમાં મૂકું તો, આપણે ગુજરાતી નેટ જગતના સુનિયોજિત વિકાસ દ્વારા આપણે તેને લોકપ્રિય તથા લોકભોગ્ય બનાવી વિશ્વમાં ગુજરાતી ભાષાના પ્રચાર, પ્રસાર તથા સંવર્ધન અર્થે સર્વાંગી પ્રયત્નો કરવા છે.

આપણે શ્રેષ્ઠ બુદ્ધિજીવીઓનું બ્રેઈન-ટ્રસ્ટ ઉભું કરીએ જેમાં કર્તવ્યનિષ્ઠ, પરિપક્વ, અનુભવી છતાં મનથી યુવાન, સંન્નિષ્ઠ, દૂરદર્શી, ઉત્સાહી સાથીદારો હોય. આપણે એવા મિત્રો જોઈશે જેઓ પોતાની દ્રષ્ટિથી અને પોતાની સ્વતંત્ર બુદ્ધિથી કાંઈક આગવું યોગદાન આપી શકે, સમાજના વિવિધ વર્ગો સાથે સંવાદ રચી શકે અને વિવિધ પ્રવૃત્તિઓમાં સૌને પ્રેરક બળ પૂરું પાડે. જ્યારે ચર્ચા ચાલુ હશે ત્યારે સાથે સાથે આ બુદ્ધિજીવીઓ આવતી કાલના નેટ જગતની રૂપરેખા ઘડવા લાગશે.

જ્યારે આપણે ગુજરાતી નેટ જગતમાં સંવાદિતા અને એકતાની વાત કરીએ છીએ, ત્યારે કેટલાક પાયાના મુદ્દાઓ આપણે સમજવા અથવા સ્વીકારવા પણ પડશે. :

(1) ગુજરાતી નેટ જગત ત્રણ ભાગમાં વહેંચી શકાય: ભારત સ્થિત ગુજરાતી નેટીઝન, અમેરિકન કોંટિનન્ટ સ્થિત ગુજરાતી નેટીઝન તથા વિશ્વના બાકીના ભાગોમાં સ્થિત નેટીઝન.

(2) ત્રણે પ્રકારના નેટીઝંસના પ્રશ્નો અલગ અલગ પ્રકારના હોઈ શકે છતાં ત્રણે વચ્ચે સમન્વય જરૂરી બનશે.

(3) ગુજરાતી નેટ જગતને લોકપ્રિય કરવા તથા લોકભોગ્ય કરવા ઘણા પ્રયત્નોની જરૂર છે. તે સમય માગી લેશે.

(4) ગુજરાતી પ્રજામાં ગુજરાતી નેટ જગત વિષે જાગૃતિ આણવી પડશે. ઘણા જાણતા જ નથી કે ગુજરાતી ભાષામાં સાઈટ્સ અસ્તિત્વમાં છે!! ઈંટરનેટનું સાર્વત્રિક મહત્ત્વ સિદ્ધ કરવું પડશે.

(5) તમામ ગુજરાતી નેટીઝનને સાંકળતી એક બંધારણવિહોણી સંસ્થારૂપ વ્યવસ્થા અથવા કોઈક કામચલાઉ કડીની રચના કરવી પડશે. શરૂઆતમાં આ વ્યવસ્થા તદ્દન સરળ અને બંધારણવિહોણી હશે. તેને નામ તથા પ્રતીક-ચિન્હ આપવામાં આવશે જેને ઓછી ચર્ચાથી, ઝાઝા વિવાદ વગર કામચલાઉ ધોરણે સ્વીકારી લેવામાં આવે. ગુજરાતી ભાષાની દરેક સાઈટ કોઈ પણ શરત – બંધન વિના આ બિન-પક્ષીય સંસ્થા/વ્યવસ્થા/ કડીનું નામ તથા/અથવા પ્રતીક – ચિન્હ પોતાની સાઈટ પર પ્રદર્શિત કરશે.. જો ચિન્હ શક્ય ન હોય તો એકાદ સૂત્ર – સ્લોગન મૂકી શકાય. ગુજરાતી નેટ પરની પ્રત્યેક સાઈટ આ નામ/ચિન્હ/ સ્લોગન દ્વારા ગુજરાતી ભાષા પ્રત્યેની પોતાની સેવાપરાયણતાની/ કટિબદ્ધતા વ્યક્ત કરશે. આ હશે આપણી એકતાનો પહેલો તબક્કો.

(6) બીજા તબક્કામાં આપણે ક્ષેત્રીય – રીજનલ – લેવલ પર સંમેલનો યોજી આપણા વિસ્તારના નેટીઝનથી પરિચય કેળવીશું. પ્રશ્નો, સમસ્યાઓ, સૂઝાવ તથા વિચારોની આપલે કરીશું. તેને ઈન્ટરનેટ પર મૂકીશું.

(7) દરમ્યાન ગુજરાતી બ્લોગર્સ ભાઈ-બહેનો વિશેષ સક્રિય થઈ ગુજરાતી નેટ જગતનું મહત્ત્વ દર્શાવતી પોસ્ટ્સ તેમજ તે અંગે થઈ રહેલા પ્રયાસોને ચમકાવતી પોસ્ટ્સ પોતાના બ્લોગ્સ પર સમયાંતરે પ્રસિદ્ધ કરતા રહે તે જરૂરી બનશે.

(8) ત્રીજા તબક્કામાં આપણે આંતરરાષ્ટ્રીય કક્ષાએ ગુજરાતી નેટ જગતની વૈશ્વિક વ્યવસ્થાને ઔપચારિક રૂપ આપીશું.

આ સાથે આ ક્ષણની એક તાતી જરૂરિયાત છે નવોદિત બ્લોગર્સને માર્ગદર્શનની, જાણકારીની. ટેકનીકલ હેલ્પની. ઓપરેટિંગ સિસ્ટમ, બ્રાઉઝર, ફોન્ટ અને આ બધાની પરસ્પર કોમ્પેટિબિલિટી …. આવી અનેક બાબતોની સમસ્યા સૌને સતાવતી હોય છે. આ અંગે ટેકનિકલ નિષ્ણાતો આગળ આવે અને યોગ્ય ફોરમ દ્વારા ઘટિત કરે. આને અગ્રતાક્રમ આપીં શકાય.

આપણે યથોચિત સમયે સાહિત્યસંસ્થાઓ, શાળાથી લઈને કોલેજ-યુનિવર્સિટી સુધીની સંસ્થાઓ, શિક્ષણ જગત સાથે સંલગ્ન શિક્ષકો-પ્રોફેસરો, ખાનગી જાહેર સંસ્થાઓ, પ્રચાર-પ્રસાર-મીડિયા તથા સાહિત્યજગતનો સાથ મેળવવો પડશે. આપમાંથી ઘણાએ ગુજરાતી નેટ જગત પર ઉપયોગી કાર્યો કર્યાં છે તે પ્રશંસાપાત્ર છે. ગુજરાતી નેટ જગતને લોકપ્રિય અને લોકભોગ્ય કરવા માટે આપણે સમાજનો બહોળો સાથ મેળવવો પડશે. સૌને સાથે રાખીશું તો પ્રગતિ ત્વરિત હશે. સાથે જ યાદ રાખવું ઘટે કે કાર્યો તો આપણે જ કરવાં પડશે, તેમાં બીજાના ભરોસે બેસી નહીં રહેવાય.

આપ સૌને ખુશી થશે કે છેલ્લા ચાર-છ મહિનાથી આ દિશામાં મેં નક્કર અને પરિણામલક્ષી કાર્યો સ્વેચ્છાએ ઉપાડી લીધાં છે. મારા મિત્ર શ્રી સુરેશભાઈ જાનીને હું વધતે-ઓછે અંશે માહિતગાર કરતો રહું છું. “મધુસંચય” પર આ અંગે જૂન 2006થી વખતોવખત માહિતી મૂકેલી છે.

મારી વાતો, મારાં સૂચનો અંતિમ સત્ય છે અને તે જ સ્વીકારવાં તેવો મારો જરા યે આગ્રહ નથી. મને સૂઝ્યું તે લખ્યું. આપણે એક-બીજાના વિચારો પર ખુલ્લા દિલે ચર્ચા કરીએ અને ઉદારતાથી બીજાના વિચારો સાંભળીએ.

આપણી વચ્ચે મતભેદ હોઈ શકે. સ્વીકારી લઈએ. વિમર્શ કરી પછી નિર્ણય પર આવીએ. પણ સાથે રહીએ.

આપણી સામે સમસ્યાઓ ઘણી છે. દા.ત. ફોન્ટ અથવા જોડણી અંગે વિચારણા. જો આવા પ્રશ્નોને અત્યારે વળગી રહીશું તો ચર્ચાઓ ચાલ્યા જ કરશે, મત-મતાંતરો થશે , વિવાદો ઉભા થશે અને કામ ખોરંભે પડશે. તેથી તબક્કાવાર ઝડપભેર કામ ઉપાડી લઈએ તો જ કાંઈક નક્કર થઈ શકશે.

પહેલાં એકતાની ભાવના સિદ્ધ કરીએ, પછી સાથે બેસીને સમસ્યાઓનો ઉકેલ શોધીએ.

ચાલો, ગુજરાતી નેટ જગતને લોકપ્રિય તથા લોકભોગ્ય કરીએ.

શુભેચ્છાઓ સાથે …. હરીશ દવે અમદાવાદ.