નેહા! તમારી કોમેંટ્સ

.
Dear Neha,

I am trying to understand what you wish to convey.

See the tragedy! I want to reply to your comments but my comment is not accepted and published at my own blog! Could be some technical problem. Hence this mode. Anyway, thanks for your response.

નેહા! તેં આટલા રસપૂર્વક બ્લોગ-પોસ્ટ્સ વાંચી, વિચાર્યું અને પ્રતિભાવ આપ્યો તે આ બ્લોગની ધ્યેયસિદ્ધિની નિશાની છે.

સાચો વિચારક અનુયાયીઓ નથી ઈચ્છતો; તે તો માત્ર વિચાર-ક્રાંતિ જગાવવા ચાહે છે. સમાજ, વિશેષ તો યુવાવર્ગ વિચાર કરતો થાય તો ય ઘણું છે.

વિચારોની પગદંડીઓ ઘણી છે; અનેક રસ્તાઓ સામે પડ્યા છે; કઈ રાહથી કઈ દિશામાં જવું તે વ્યક્તિએ સ્વયં નક્કી કરવાનું છે. પણ તે માટે પહેલાં વિચારવું પડશે. તેં વિચાર્યું; હવે તારાપ્રશ્નોના જવાબ પણ તને ખુદ જ મળશે!

બેટા! યાદ રાખો કે આ દુનિયામાં પ્રત્યેક પદાર્થ, પ્રત્યેક ઘટના સાપેક્ષતાથી સીમિત છે. આદર્શ સંસ્કૃતિ પણ કોઈ સંદર્ભમાં જ આદર્શ હોઈ શકે. પથપ્રદર્શકોએ આપેલા વિચારો, સિદ્ધાંતો, કાર્યો, ફિલોસોફી …. દરેકમાં કાંઈક હકારાત્મક હશે; કશુંક તમારી દ્રષ્ટિએ નકારાત્મક પણ હશે. બધું જ તમારે યોગ્ય પરિપ્રેક્ષ્યમાં સમજવાનું છે. તે વ્યવસ્થા સારી જ છે.

દરેક વિચારધારામાંથી, દરેક વ્યવસ્થામાંથી તમારે તમારી દ્રષ્ટિએ તમને સ્વીકાર્ય સારપ શોધી લેવાની છે. જો એક જ વિચારધારા કે સમાજવ્યવસ્થા કે સંસ્કૃતિ હંમેશ માટે “આદર્શ” બની જાય તો તમારે તેને આંખો મીંચીને અનુસરવી પડે; તમારો જીવન પ્રવાહ યંત્રવત બની જાય; તમારામાં જડત્વ આવી જાય. તમે તમારું સ્વતંત્ર અસ્તિત્વ ગુમાવી બેસો.

માટે જ બુદ્ધિનાં દ્વાર ખુલ્લાં રાખી બધું વાંચો; નિહાળો; વિમર્શ કરો; સારું છે તે ગ્રહણ કરો; નથી જોઈતું તે છોડી દો. બીજા શું કરે છે તેની પણ ચિંતા ન કરો, પરવા ન કરો … મારા કાર્યોનું શું થશે અથવા કર્તવ્યશીલતાનું શું થશે તેની ચિંતા રાખવાની જરૂર નથી. આપણે આપણું કર્તવ્ય કરતા રહીએ તે પણ આત્મસંતોષની વાત છે.

આમ છતાં હું સ્પષ્ટ કરું કે હું ક્રાંતિકારી નથી, સમાજ ઉદ્ધારક નથી, ઉપદેશક નથી. સાચો વિચારક કદી પોતાના વિચારો બીજા પર થોપે નહીં, તે તો બીજાને વિચાર કરવા પ્રેરે. સૌની વિચારશક્તિ જગાવે અને કદાચ તેમાંથી પ્રેરણા પણ લે!

હું ઈચ્છું કે હજી વધારે ચર્ચા થાય અને વિચારો જાગે; બસ; તે જ મારા કાર્યની સફળતા હશે. પ્રતિભાવ બદલ આભાર.

P.S.: મિત્રો! આ બ્લોગનો હેતુ શું છે? આપણે સૌ સાથે મળીને વિચાર કરીએ તથા આપણા જ્ઞાનના સીમાડાઓનો વિસ્તાર કરીએ. હળીમળીને વાતો કરીએ. આ દ્વારા આપણી જીવનદ્રષ્ટિ વિકસાવીએ. તેથી, આપણે છીછરી કોમેંટસ, ક્ષુલ્લક ચર્ચા કે વિચારોમાં ભૂલ શોધવાની હરીફાઈથી દૂર રહીશું. સહમત થવું- અસંમત હોવું…. બની શકે. તે વિના કડવાશે ગરિમાપૂર્વક વ્યક્ત થઈ શકે. દરેકની વિચાર ક્ષમતા ભિન્ન હોય છે, દ્રષ્ટિ અલગ અલગ હોય છે …. કોઈને ઉતારી પાડવાની જરૂર નથી. સહિષ્ણુ થઈ સૌના વિચાર માણીએ. ચાલો, આપણા ગુજરાતી બ્લોગજગતનું ગૌરવ જળવાતું હોય તેવી સુરૂચિપૂર્ણ વિચાર અભિવ્યક્તિને તક આપીએ આભાર.